يوميات عاطل تقدم .. ء
"قميص نومى" .. شريط جديد
.. حاليا بالاسواق
===========
اهلا بكم من جديد يا جماعة .. أعتذر عن التأخير .. وأعود اليكم بكارثة جديدة .. من كوارث "عاطل الشحات" .. والكارثة هذه المرة .. فنية !! .. اتفضلوا معانا ..
أخيرا وبعد طول عناء وشقاء ... جاءت الفرصة .. فرصة العمل .. وحينما تأتى الفرصة لازم البنى آدم يمسك فيها بأديه وسنانة .. وهذا ماحدث معى ..
نايم فى بيتنا من كام يوم .. واذا بجردل ماية ساقعة نازل فوق نافوخى وبيقومنى من أحلاها نومة على صوت والدى المصون ..
ابويا : أصحى يا خفاش الظلام انت !!
انا مستفيقا بفزع : ايه .. مين .. المجارى طفحت .. قصر النيل دخل على المنيل .. كليبر ماقتلش محمد على .. سليمان الحلبى ماتخذوقش .. سليمان الحلبى لسه حى !!
ابويا : سليمان الحلبى ماتخذوقش ؟؟ .. انت شارب خابور قبل ماتنام ياض انت ولا ايه ؟!!!
انا مستفيقا : صباح الخير يا حاج .. ايه الماية دى كلها .. انتوا هاتزرعوا الأوضة ولا ايه ؟!!
ابويا : آه .. عايزنها تبقى خضرا .. قوم يا حشاش انت فذ !!
انا بزهق : ايه ياحاج المعاملة دى .. اومال لو ماكنتش ابنك كنت هاتعمل ايه ؟!!
ابويا : مش ابنى ؟؟ .. يا سلااااااام .. اهو ده بقى اسمه "حلم لم يكتمل" !!
انا : لالالا .. كدة كتير .. جرادل ماية .. وشتيمة .. واهانات .. انا لازم اسيب البيت ده حالا وامشى !!
ابويا فاتحا باب الشقة بمنهى السرعة : شرفتنا !!
انا مستدركا : هه ؟ .. آ .. نياهاهاها .. هو الواحد مايعرفش يهزر معاك شوية ياحاج ... انا بهزر يا جدع .. اقفل الباب ده واخزى الشيطان كدة !!
ابويا : تنزل حالا تشوفلك شغلانة .. مش نايم واحنا صاحيين وصاحى واحنا نايمين كدة !!
انا : يابا .. يعنى هو انا لقيت شغل وقولت لأ .. ماعلى يدك .. الشغلتين اللى جولى من بعد ماتخرجت .. واحدة صاحب المحل اللى كان هايشغلنى مات .. والتانية الراجل اللى كان هايتوسطلى عشان يشغلنى فى الشركة اللى هو بيشتعل فيها اترفد !!
ابويا : عشان بوز امك فقر !!
امى قادمة من المطبخ ممسكة بالمبشرة : عايز منى ايه يا "سيد يا شحات" .. هو انت مش قادر على الفسل ابنك .. هاتتنطط عليا انا ؟!!
ابويا بخوف : يا فندم انا ماقصدش .. بس انا عايز مصلحة ابنك .. لازم يبقى راجل ويعتمد على نفسه .. ده بقاله 8 سنين متخرج وماعملش حاجة .. ده غير انه اصلا واخد الكلية فى 8 سنين !!
انا ضاربا انفى فى السماء: طب حضرتك حددلى طلباتك فى نقط محددة لو سمحت .. عشان انا وقتى مش ملكى والله !!
ابويا : ماشى ياعم زويل .. تنزل الشارع تعدى على المحلات .. محل محل .. تسأل على شغل .. واذا مالقتش تخش الشارع اللى بعده وهكذا كل يوم لحد ما أكيد هاتلاقى واحد أهطل يرضى يشغلك عنده !!
انا بكبرياء : ايه ده ايه ده .. انت عايزنى امشى اتذلل للى يسوى واللى مايسواش .. آسف .. كرامتى ماتسمحش !!
امى : أبوك عنده حق يا "عاطل" .. لازم تنزل تدور .. مش هاتفضل قاعد فى البيت زى قفص الجوافة كدة !!
انا : بس يا جماعة ..
ابويا وأمى : بــــــــــــــرة !!
نزلت الشارع مقهورا .. ابحث بعينى عن محل نضيف ادخله .. وسط متابعة والدى من البلكونة عشان ما زوغش .. ولقيت فى وشى محل كاسيت فاتح جديد فى شارعنا .. قولت مصلحة .. اشوف ده .. واهو شغل الاغانى بقى لايق مع السيجارتين وكوباية الشاى .. أهو منها نظبط الجمجمة ومنها بنشتغل .. ولاحظت على باب المحل بوستر كبير لفنانة وزنها يتعدى الـ 150 كيلو .. مكتوب تحت اسمها "قميص نومى" البوم جديد لـ " مكارم حبهان" .. قولت يمكن تضرب معايا وابقى زى اللى فى الصورة دى .. وهى يعنى احسن منى فى ايه .. ده انا حتى عودى مظبوط عنها !! .. ففكرت فى دخله ادخلها على صاحب المحل .. وقد كان ..
انا : سلامو عليكوا يا "هندزة"
صاحب المحل بقرف : وعليكوا !!
انا : عندك أغانى عمرو دياب المتسربة من الالبوم الجديد ياريس ؟!!
صاحب المحل : انت من المصنفات ولا ايه ؟!!
انا : ليه يعنى .. عشان سألتك على المتسرب ؟؟ .. طب لما انتوا بتخافوا كدة .. بتشتغلوا فيه ليه ؟!!
صاحب المحل برعب : لا والله ياباشا .. انا مابشتغلش فى المتسرب .. وبعدين عمرو ده حبيبنا .. ومانقدرش نأذيه .. ده انا حتى أجدد حاجة عندى ليه شريط "قمرين" .. والله ياباشا ده انا غلبااااااااااااان !!
انا : ياعم باشا ايه بس .. مين قالك انى باشا ولا من المصنفات حتى .. انا عايز اشتغل .. الاقيش عندك شغل الله يستر عرضك ؟!!
ولم ادرى بنفسى الا وصاحب المحل يناولنى بوكس فى عينى بعد ما اكتشف حقيقتى !!
انا : آآآآآآآآآآآآآآآآآآآه ... عينـــــــــــى
ابويا مصفقا بكلتا يديه فرحا من البلكونة : هييييييييييييييييييييييييه !!
وظللت طوال اليوم على هذا المنوال ادخل المحل فأقابل بجمل الرفض التام امثال : لا والله ده احنا عندنا عمالة زايدة .. أو .. كان على عينى بس انا عايز بنات !! .. أو .. الله يسهلك يابنى .. أو بعض الجمل الظريفة مثل : طب ماتروح تعمر الصحرا !! .. أو .. روح اشتغل فى حديد عز !!
وهكذا .. حتى يأست من كتر التلقيح من اللى يسوى واللى مايسواش .. وقررت العودة الى منزلنا الموقر .. واللى يحصل يحصل بقى ..
وانا فى طريق عودتى الى المنزل اذا بى أفاجأ بسيارة فارهة تعترض طريقى ؟؟ واذا بزجاج السيارة ينفتح وتخرج منه يدا نسائية لتشاور لى
!!
الست
: بست .. بست .. انت يا ..
انا بلهفة
: ايوة ياست هانم .. محسوبك " عاطل الشحات" .. اى خدمة ؟ !!
الست
: ايه ده ؟؟ انت مش عارفنى ؟ !!
انا
: ايه ده .. مش ممكن ... اخص عليا .. الفنانة عبير صبرى .. معلش ياست هانم .. أصلى لسه واكل بوكس مطيرلى عينى .. وبعدين اصل شكلك من غير الحجاب مختلف بصراحة .. الا بالمناسبة .. هو حضرتك قلعتى الحجاب ليه .. ناوية تلبسى خمار ؟ !!
الست بنرفزة
: اخرس يالا .. عبير فهمى ايه .. وخمار ايه !!
انا مقاطعا
: صبرى حضرتك .. اسمها عبير صبرى .. مش فهمى !!
الست
: انت هاتخرس ولا افتح باب العربية ده الزقه فى وشك ؟ !!!
انا
: تحت أمرك يا ست هانم !!
الست
: انا " مكارم حبهان " يا عنيا !!
انا ناظرا الى السيارة الفارهة
: وله فى خلقه شئون .. حضرتك مكارم حبهان بتاعة اغنية " قميص نومى " ؟ !!!
حبهان
: آه ياعنيا .. هى دى .. جتك البلاوى .. صدعتنى .. قصره .. انت بتشتغل ؟ !!
انا
: مانا لو كنت بشتغل ماكنتش هابقى فى الشارع فى ساعة زى دى حضرتك !!
مكارم
: يعنى صايع !!
انا
: لأ لو سمحتى .. "عاطل" !!
مكارم
: نياهاهاهاها .. طب ماتزعلش ياسى "عاطل" .. عندك استعداد تشتغل ؟ !!
انا
: ياسلام .. خدامك ياست هانم .. بس انا مابعرفش اغنى .. وإذا كنتى عايزانى ارقص .. فآسف .. اخلاقى ماتسمحليش .. بس ممكن اطبل وراكى مافيهاش حاجة !!
حبهان
: على فكرة يالا انت متخلف .. وفعلا لازم تبقى عاطل ماتنفعش غير كدة .. بس للأسف وشك "فوتوجونيك" !!
انا متصنعا الفهم : "فودوفونيك" ؟؟ .. لا والله ولا أقدر
.. مافياش بطن !!
مكارم بنرفزة
: اركب يالا انت قبل ما ادوسك !!
وركبت مع حبهان حبيبة الملايين ( فينك يابا تيجى تشوف ابنك اللى هاريه تريقة فى الراحة والجاية راكب جنب مين !! )
انا مطلا رأسى من نافذة شباك السيارة وبصوت جهورى : حــــــد رايــــــــح القـــــلـــعـــــة
!!
بعد هات وخد داخل السيارة طوال المشوار بينى وبين
" حبهان " تخللها بعض التخميس والامريكانى واللبس فى الارصفة بسبب مايحدث بداخل السيارة من تبادل العراك .. وصلنا أخيرا الى .. مبنى الاذاعة والتليفزيون !!!
مكارم
: انزل ياض انت !!
انا
: بالسرعة دى زهقت منى يا " مكرم " ده احنا ماكملناش نص ساعة مع بعض !!
فأذا بمكارم تفتح باب السيارة المجاور لى وتدفعنى بكلتا يديها وأرجلها لأنبطح ارضا خرج السيارة
!!
انا
: كدة ياحبهان ؟؟ .. ماكانش عيش وكلاكس اللى بينا !!
مكارم بعد ان نزلت واغلقت السيارة
: اسمع ياض انت ... انت هاتطلع معايا فوق .. عشان اقدمك للمخرج !!
انا
: ماقولنا مابنعرفش نغنى .. ومابنرقصش !!
مكارم
: لا يا خفيف .. لا هاتغنى ولا هاترقص .. انت هاتقف ورايا فى الاستوديو وانا بغنى .. وهاتمسكلى الدفوف !!
انا
: دفوف ايه .. هو احنا هانفتح الاندلس ؟ !!
مكارم بزهق
: شخشيخة .. هاتمسك جوز شخاشيخ .. وتقف تتنطط ورايا بيهم وانا بغنى فى البرنامج .. ولو أديت كويس .. ممكن اخليك معايا على طول .. وهاديك فى الحلقة 200 جنيه .. ماشى ؟ !!
انا بلهفة : 200جنيه ؟؟
.. ماشى يافندم .. تحت امرك .. ده انا ممكن ارقص كمان وتزودينى 50 جنيه !!
حبهان
: لا ياحبيبى .. البرنامج مافيهوش رقص .. هو باند وبس !!
انا
: بس انا لامؤاخذه اول مرة اشوف حفلة فى برنامج .. انا اللى اعرفه ان الحفلات بتبقى فى المسارح او فى مارينا مع بتوع البكينى !!!
مكارم
: ماهو ده يا حبيبى مش برنامج برنامج يعنى .. ده اسمه "توك شو" !!
انا ببلاهة
: آه عارفه .. بتاع هالة سرحان .. بس دى انا اسمع انها اتنفت من البلد !!
مكارم حبهان
: اطلع قدامى يا حيوان !!
وبعد لف ودوران فى قلب المبنى ولخبطة وتفحيص وتمحيص .. واتوه فى المبنى زى العيال الصغيرة ويرجعوا يلاقونى .. أخيرا .. جاء وقت التسجيل ...
المخرج بنرفزة
: أكشااااااااان !!
احدهم مشاورا لجمهور الاستوديو
.. فوقف الجميع وبدأوا بالتهليل والتسقيف والتشجيع الحار لمذيعة البرنامج التى دخلت بأبتسامة عريضة وهى تشاور بيدها الى معجبيها من الجماهير المأجورة !!
المذيعة بعد ان أمرت الجميع بالسكوت
: النهاردة معانا .. صوت عزب .. موهبة حقيقية .. حنية اسمهان .. قوة ام كلثوم .. احساس فيروز .. اما الشكل فحدث ولا حرج .. النهاردة معانا .. معانا .. معانا ..
الجمهور
: هــــــــــا !!
المذيعة : "مكـــــارم حبهــــــان" !!
الجمهور المبرمج
: هيييييييييييييييه .. هوووووووووووه
ودخلت مكارم وهى ترتدى فستان طويل اسود مقطع من كل ناحية زى هدوم الشحاتين ( تقريبا لزوم الموضة !! ) وفى الاسفل شبشب حمام ( مش عايزة تنسى انها بنت حبهان !! )
الجمهور المبرمج
: هييييييييييه .. يمين .. شمال .. بنحبك يا حبهان !!
المذيعة بعد ان أمرت الجمهور من الخلف الكاميرا بالسكوت
: الفنانة مكارم .. احكيلنا عن يومك .. بتقضيه ازاى !!
مكارم
: والله انا بصحى الصبح ...
الجمهور مصفقا بحرارة عالية
: هيييييييييييييييه
انا : !!!!!!!!!!!!!!!!!
مكارم مكملة
: بصحى الصبح .. بلاقى " جولى " محضرة لى الفطار !!
المذيعة
: معلش يافنانة .. عشان الجمهور عايز يعرف بشكل أوضح .. مين " جولى " ؟؟
مكارم بمنتهى الفخر
: دى الشغالة الفليبينية بتاعتى !!
الجمهور بنفس الحرارة مصفقا .. وأخذوا يهتفون
: هييييييييييييييييييييييه .. جولى .. جولى .. جولى
انا : !!!!!!!!!!!!!!!
مكارم
: وبعد ماباخد "البريك فاست" .. أكيد بقوم اغسل ايدى !!
الجمهور
: هيييييييييييييييييييييه ... مكارم يا نضيفة .. خليتى عقولنا نضيفة !!
انا بعد ان فاض بى
: "بريك فاست" يابنت حبهان .. اقطع دراعى اما كانوا ملّوكى الكلمة فى السماعة عشان تعرفى تنطقيها ؟ !!
المخرج
: استوووووووووووب .. مين الخروف اللى اتكلم !!
مكارم
: دى وقاحة .. انت هاتتكتم ولا اطلعك برة ؟ !!
انا
: خلاص .. اتكتمنا !!
المخرج
: أكشااااااااااااااااااان
وبعد سرد اليوم العظيم للفنانة العظيمة
.. من "البريك فاست" لحد مابتقعد مع الكلب بتاعها قبل ماتنام .. جاء وقت الاغنية .. أى جاء وقتى !!
المذيعة
: فى الحقيقة يافنانة .. ده كلام جميل .. ويومك قيّم أوى .. بس جمهورك جاى هنا مخصوص عشان ( يشوفك ) وانتى بتغنى .. فياريت ماتكسفيهمش !!
مكارم قبل ماتتفضح
: طيب مع ان عندى برد .. بس هاغنى بقى عشان ماقدرش اقول لجمهورى لأ .. بس استحملونى بقى عشان البرد ( وطبعا هى لاعندها برد ولا حاجة .. هى بتسبق بس عشان الناس ماتعرفش ان صوتها نشاذ اصلا بس التكنولوجيا الحديثة بتخبى بلاوى !! )
المهم
..
المذيعة
: هاتمسعينا ايه بقى يا فنانة ؟؟
مكارم للجمهور
: تحبوا تسمعوا ايه !!
الجمهور المبرمج
: قميص نومى .. قميص نومى .. قميص نومى .. هييييييييييييييييييييييييييه !!
مكارم
: لا لا لا .. مش حافظاها !!
المذيعة
: خلاص يافنانة بقى .. ماتكسفيهمش !!
مكارم
: خلاص .. هاحاول افتكرها وأمرى لله !!
انا
: تفتكرى ايه يابنت حبهان .. ده هى الاغنية مافيهاش غير جملتين .. وبتعيدى وتزيدى فيهم عمال على بطال .. مابيتغيروش !!
المخرج
: ستووووووووووووب .. طلعولى الحيوان ده براااااااااااااا !!
مكارم
: برة ايه ... ده هو دورة دلوقتى .. معلش يا أستاذ .. استحمله دلوقتى وانا هابقى اطرده بنفسى أول مايخلص ..
المخرج
: طب يلا يا جماعة .. خلصونى .. وخلوا الليلة العك دى تخلص بقى .. ولعلى السيجارة اللف اللى عندك وهاتها يا ابراهيم .. صبرنى يارب .. اكشااااااااااااان !!
وبدأت حبهان فى النشاذ
.. وانا فى الشخشخة !!
يا حلاوتك يا الكومبيليزون
.. يا مأمبر فى قميص النوم !!
قالى تاتا تاتا ومن الاول
.. قولتله لالالأ طلقها الاول !!
يا حلاوتك يا الكومبيليزون
.. يا مأمبر فى قميص النوم !!
قالى تاتا تاتا ومن الاول
.. قولتله لالالأ طلقها الاول !!
يا حلاوتك يا الكومبيليزون
.. يا مأمبر فى قميص النوم !!
قالى تاتا تاتا ومن الاول
.. قولتله لالالأ طلقها الاول !!
الجمهور يخرج عن صمته
: حرام .. كفاية .. حرام .. كفاية !!
وبعد ربع ساعة من الغناء والشخشخة
.. لم اتحمل اكثر من هذا .. واذا بى لا أدرى بنفسى الا وانا امسك بأكبرها طبلة فيك يا ستوديو .. وعلى دماغ مكارم ونزلت !!
مكارم
: آآآآآآآآآآآآآآآآآآآآآآآآه .. مين طفى النور !!
وعلى غرزة
" النفس الطويل " حيث كان يجلس اصدقاء الكفاح بدونى ..
حنفى
: شوفتوا ياجدعان اللى الواد "عاطل الشحات" عمله ؟؟
احد صبيان الغرزة
: آه صحيح هو فين النهاردة .. مش شايفه معاكوا يعنى ؟؟
ثم قطع صوت التلفاز كلام الجميع لتظهر احدى المذيعات على أحد القنوات الفضائية الفنية تذيع الخبر التالى
:
القبض على مختل عقليا أقتحم الاستوديو .. وتهجم على ( نجمة المجتمع ) مكارم حبهان امام جمهورها .. والفنانة تنجو من الحادث بأعجوبة !!
( مع قيام القناة بوضع صورة أثناء سرد الخبر لمكارم من على سرير المستشفى وهى تغمز بأحدى عيناها
.. وتشاور لجمهورها رافعة ابهامها لأعلى فى اشارة منها الى ان كله تمام !! )
المذيعة مستطرده
: وبهذه المناسبة نشاهد الآن اعزائى المشاهدين أحدث كليبات النجمة الامعة .. وهو كليب .. "قميص نومى" .. مع تمنياتنا الطيبة للفنانة بأكتمال الشفاء .. حتى تعود الينا من جديد وتثرينا بفنها !!
ساعتها قام جميع من فى الغرزة من اماكنهم وبدأوا فى الرقص مع الكليب وكل منهم ممسكا بالشيشة فى يد وفى اليد الأخر ( لى الشيشة ) مرددين
:
يا حلاوتك يا الكومبيليزون
.. يا مأمبر فى قميص النوم !!
قالى تاتا تاتا ومن الاول
.. قولتله لالالأ طلقها الاول !!
حلاوتك يا حبهاااااااااان !!
واسمع سلام .. زويل ماطفشش من شوية !!
حد يقوملى محامى !!
آآآآآآآآآآآآآآآآآآآآآه
والى اللقاء فى حلقة أخرى من ..
يوميـــــــــــات عـــــــــاطــــــــــل